Crime News: ଭୁବନେଶ୍ୱର (ରିପୋଟର୍ସ ପେନ୍) : ଈର୍ଷା ପରାୟଣ ହୋଇ ଯୁବକଙ୍କୁ ତଣ୍ଟିଚିପି ହତ୍ୟା ଉଦ୍ୟମ କରିବା ଅଭିଯୋଗରେ ତମାଣ୍ଡୋ ପୁଲିସ ଅଭିଯୁକ୍ତକୁ ଗିରଫ କରିଛି । ଗିରଫ ଅଭିଯୁକ୍ତ ଜଣକ ଜଟଣୀର ବିଷ୍ଣୁ ପ୍ରସାଦ ଜେନା । ପୁଲିସ ତା ବିରୋଧରେ ଏକ ମାମଲା ରୁଜୁ କରି ଅଭିଯୁକ୍ତକୁ କୋର୍ଟ ଚାଲାଣ କରିଛି । ଏନେଇ ନିମାଇଁ ଚରଣ ସାହୁ ଥାନାରେ ଅଭିଯୋଗ କରିଥିଲେ ।
ସୂଚନାଯୋଗ୍ୟ ଯେ, ଅଭିଯୋଗକାରୀ କଳିଙ୍ଗ ବିହାର ଅଂଚଳରେ ଥିବା ଗୋଟିଏ ଏନଜିଓ ଅଫିସରେ ଦୀର୍ଘ ଦିନ ହେବ କାର୍ଯ୍ୟ କରିଆସୁ ବେଳେ ଗିରଫ ଅଭିଯୁକ୍ତ ଜଣକ ଏକ ନବ ନିର୍ମିତ ଦଳୀୟ ଅଫିସ କରୁଛନ୍ତି । ଅଭିଯୋଗକାରୀଙ୍କରଏନଜିଓ ମାଲିକଙ୍କ ସହିତ ଉତ୍ତମ ସଂପର୍କ ଥିବାରୁ ଅଭିଯୁକ୍ତ ଜଣକ ଈର୍ଷା କରୁଥିଲେ ଓ ଏଥି ପାଇଁ ଉଭୟେ ନିମାଇଁ ଓ ଅଭିଯୁକ୍ତ ବିଷ୍ଣୁଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଗତ ତା.୧୬.୧୦.୨୦୨୪ ରିଖ ସନ୍ଧ୍ୟା ୭.୩୦ ସମୟରେ ଅଭିଯୋଗକାରୀ ଅଫିସ କଂପୁଟରରେ କିଛି କାମ କରୁଥିବା ସମୟରେ ଅଭିଯୁକ୍ତ ନିଶାସକ୍ତ ଅବସ୍ଥାରେ ସେଠାରେ ପହଂଚିଥିଲେ ଓ ଅଫିସରେ ନିମାଇଁଙ୍କୁ ଏକାକୀ ଥିବାର ଦେଖି ଏକ କପଡ଼ାରେ ପଛପଟରୁ ତାଙ୍କ ଗଳା ଚିପି ହତ୍ୟା କରିବାକୁ ପ୍ରୟାସ କରିଥିଲେ ।
ଏଥିରେ ନିମାଇଁ ଅଣନିଶ୍ୱାସୀ ହୋଇପଡ଼ିଥିବା ବେଳେ କୌଶଳ କ୍ରମେ ଖସି ଯାଇ ନିଜ ଜୀବନ ବଂଚାଇବାକୁ ପ୍ରୟାସ କରିଥିଲେ । ସେହି ସମୟରେ ଅଭିଯୁକ୍ତ ଜଣକ ନିମାଇଁଙ୍କର ହାତକୁ ଜାବୁଡି ଧରି କାମୁଡି ଦେଇଥିଲେ ଓ ତାଙ୍କର ପକେଟରୁ ଗୋଟିଏ ମୋବାଇଲ ଫୋନ ଛଡାଇ ନେଇଥିଲେ । ସହାୟତା ପାଇଁ ନିମାଇଁ ସ୍ଥାନୀୟ ଦୋକାନୀମାନଙ୍କୁ ଡାକିବାରୁ ଅଭିଯୁକ୍ତ ଜଣକ ସେମାନଙ୍କୁ ମଧ୍ୟ ସାହାଯ୍ୟ କରିବା ଠାରୁ ଦୂରେଇ ରହିବାକୁ ଧମକ ଦେଇ ସେଠାରୁ ଚାଲି ଯାଇଥିଲେ ।
ପୁଲିସ ତଦନ୍ତ କରିବା ସହ ବିଶ୍ୱସ୍ତ ସୂତ୍ରରୁ ସୂଚନା ପାଇ ଗିରଫ ଅଭିଯୁକ୍ତଙ୍କୁ କାବୁ କରିଥିଲେ । ପଚରାଉଚରା ବେଳେ ଅଭିଯୁକ୍ତ ତାଙ୍କର ଅପରାଧ ସ୍ୱୀକାର କରିବା ସହ ଅଭିଯୋଗକାରୀଙ୍କର ମୋବାଇଲ ଫୋନଟିକୁ ଫୋପାଡି ଦେଇଥିବା ଦର୍ଶାଇଥିଲେ । ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଚାଲୁ ରହିଛି ।
