ଭାରତୀୟ ଜନତା ପାର୍ଟି (ବିଜେପି) ନଅଟି ରାଜ୍ୟସଭା ଆସନରେ ଉପ-ନିର୍ବାଚନ ପାଇଁ ନିଜର ପ୍ରାର୍ଥୀ ଘୋଷଣା କରିଛି। ଅନେକ ବଡ଼ ନେତାଙ୍କ ନାମ ଏହି ତାଲିକାରେ ଅନ୍ତର୍ଭୁକ୍ତ। ଚର୍ଚ୍ଚା ଅନୁସାରେ ମମତା ମହାନ୍ତଙ୍କୁ ବିଜେପି ଓଡ଼ିଶାରୁ ରାଜ୍ୟସଭା ପ୍ରାର୍ଥୀ କରିଛି। କହିରଖୁଛୁ ଯେ ନିକଟରେ ମମତା ମହାନ୍ତ ସାସଂଦ ପଦ ସମେତ ବିଜେଡି ଦଳ ଛାଡି ବିଜେପିରେ ଯୋଗ ଦେଇଥିଲେ। ଏହା ପରେ ତାଙ୍କୁ ରାଜ୍ୟସଭା ଯିବାକୁ ନେଇ ଅନେକ ଚର୍ଚ୍ଚା ହୋଇଥିଲା।
ବିଜେପି କେନ୍ଦ୍ର ମନ୍ତ୍ରୀ ଜର୍ଜ କୁରିୟନଙ୍କୁ ମଧ୍ୟପ୍ରଦେଶରୁ ପ୍ରାର୍ଥୀ କରିଥିବା ବେଳେ ଓ ରାଜସ୍ଥାନର ଅନ୍ୟ ଜଣେ ମନ୍ତ୍ରୀ ରବନୀତ ସିଂ ବିଟୁଙ୍କୁ ପ୍ରାର୍ଥୀ କରିଛି। ବାର୍ କାଉନସିଲ୍ ଅଫ୍ ଇଣ୍ଡିଆର ଚେୟାରମ୍ୟାନ୍ ତଥା ବରିଷ୍ଠ ଓକିଲ ମନନ କୁମାର ମିଶ୍ରଙ୍କୁ ବିହାରରୁ ପ୍ରାର୍ଥୀ କରାଯାଇଛି। ରାଜୀବ ଭଟ୍ଟାଚାର୍ଯ୍ୟଙ୍କୁ ତ୍ରିପୁରାରୁ ରାଜ୍ୟସଭାକୁ ପଠାଇବାକୁ ପ୍ରସ୍ତୁତି ଚାଲିଛି। ଏହା ବ୍ୟତୀତ ବିଜେପି କିରଣ ଚୌଧୁରୀଙ୍କୁ ହରିୟାଣାର ପ୍ରାର୍ଥୀ କରିଛି।
ବିଜେପି କେଉଁଠାରୁ କାହାକୁ ପ୍ରାର୍ଥୀ କରିଛି?
ଓଡି଼ଶା- ମମତା ମହାନ୍ତ
ଆସାମ- ମିଶନ ରଂଜନ ଦାସ ଓ ରମେଶ୍ୱର ତେଲି
ବିହାର- ମନନ କୁମାର ମିଶ୍ର
ହରିୟାଣା- କିରଣ ଚୌଧୁରୀ
ମଧ୍ୟପ୍ରଦେଶରୁ- ଜର୍ଜ କୁରିୟନ୍
ମହାରାଷ୍ଟ୍ର – ଧର୍ଯ୍ୟଶିଳ ପାଟିଲ
ରାଜସ୍ଥାନରୁ- ରବନୀତ ସିଂ ବିଟୁ
ତ୍ରିପୁରା- ରାଜୀବ ଭଟ୍ଟାଚାର୍ଯ୍ୟ
ମୋଟ ୧୨ ଟି ଆସନ ପାଇଁ ଅନୁଷ୍ଠିତ ହେବ ଉପ-ନିର୍ବାଚନ
ଆସନ୍ତା ମାସରେ ୧୨ଟି ରାଜ୍ୟସଭା ଆସନ ପାଇଁ ଉପ-ନିର୍ବାଚନ ହେବାକୁ ଯାଉଛି। ଏହା ପରେ ବିଜେପି ନେତୃତ୍ୱାଧୀନ ନ୍ୟାସନାଲ ଡେମୋକ୍ରାଟିକ୍ ଆଲାଇନ୍ସ (ଏନଡିଏ) ଉପର ଗୃହରେ ସ୍ପଷ୍ଟ ସଂଖ୍ୟାଗରିଷ୍ଠତା ହାସଲ କରିବ ବୋଲି ଆଶା କରାଯାଉଛି। ୱାକଫ୍ (ସଂଶୋଧନ) ବିଲ୍ ପରି ପ୍ରମୁଖ ବିଲ୍ ପାସ୍ କରିବାରେ ଏହା ଦଳକୁ ସାହାଯ୍ୟ କରିବ। ବର୍ତ୍ତମାନ ୨୨୯ ସଦସ୍ୟ ବିଶିଷ୍ଟ ଉପର ଗୃହରେ ବିଜେପିର ୮୭ ସାଂସଦ ଅଛନ୍ତି ଏବଂ ଏହାର ସହଯୋଗୀମାନଙ୍କ ସଂଖ୍ୟା ୧୦୫ ରହିଛି। ୬ ଜଣ ମନୋନୀତ ସଦସ୍ୟଙ୍କୁ ଅନ୍ତର୍ଭୁକ୍ତ କରି ଯେଉଁମାନେ ସାଧାରଣତଃ ସରକାରଙ୍କ ସପକ୍ଷରେ ଭୋଟ୍ ଦିଅନ୍ତି, ଏନଡିଏର ସାଂସଦଙ୍କ ସଂଖ୍ୟା ୧୧୧ ହୋଇଯାଏ ତଥାପି ସଂଖ୍ୟାଗରିଷ୍ଠତା ସଂଖ୍ୟା ୧୧୫ ରୁ ଚାରି କମ୍।
କଂଗ୍ରେସର ଉପର ଗୃହରେ ୨୫ ଜଣ ସଦସ୍ୟ ଅଛନ୍ତି ଏବଂ ଏହାର ସହଯୋଗୀ ୫୮ ଜଣ ସଦସ୍ୟଙ୍କ ସହିତ ବିରୋଧୀ ଦଳର ସଦସ୍ୟଙ୍କ ସଂଖ୍ୟା ୮୪ କୁ ବୃଦ୍ଧି ପାଇଛି। ପ୍ରମୁଖ ନିରପେକ୍ଷ ଦଳଗୁଡିକରେ ୧୧ ଜଣ ସଦସ୍ୟଙ୍କ ସହିତ YSR କଂଗ୍ରେସ ପାର୍ଟି ଏବଂ ଆଠ ଜଣ ସଦସ୍ୟଙ୍କ ସହିତ ବିଜେଡି ଅନ୍ତର୍ଭୁକ୍ତ। ନଅ ରାଜ୍ୟରୁ ୧୨ ଟି ଖାଲି ରାଜ୍ୟସଭା ଆସନ ପାଇଁ ସେପ୍ଟେମ୍ବର ୩ ରେ ନିର୍ବାଚନ ଅନୁଷ୍ଠିତ ହେବ।
