Champions Trophy: ୧୯ ଫେବୃଆରୀରୁ ବିଶ୍ୱର ଶ୍ରେଷ୍ଠ ୮ କ୍ରିକେଟ ଦଳ ମଧ୍ୟରେ ଆଇସିସି ଚାଂପିଅନ୍ସ ଟ୍ରଫି ୨୦୨୫ ଖେଳାଯିବାକୁ ଯାଉଛି । ଯାହା ପାଇଁ ସମସ୍ତ ଦଳର ୧୫ଜଣିଆ ଦଳ ଘୋଷଣା କରାଯାଇଛି । ଏପରି ପରିସ୍ଥିତିରେ ଭାରତୀୟ ଦଳର ୧୫ ଜଣିଆ ଦଳ ମଧ୍ୟ ଘୋଷଣା କରାଯାଇଛି । ଯେଉଁଥିରେ କରୁଣ ନାୟାରଙ୍କ ନାମ ସାମିଲ ନାହିଁ । ସଂପ୍ରତି ଅନେକ ଘରୋଇ ମ୍ୟାଚ୍ରେ ଚମତ୍କାର ପ୍ରଦର୍ଶନ କରିଥିବା ନାୟାର ଚାଂପିଅନ୍ସ ଟ୍ରଫି ପାଇଁ ଭାରତୀୟ ଦଳରେ ସ୍ଥାନ ପାଇବା ନେଇ ଆଶାବାଦୀ ଥିଲେ । କିନ୍ତୁ ଏହା ହେଲା ନାହିଁ ।
ଅନେକ ଗଣମାଧ୍ୟମ ରିପୋର୍ଟରେ କୁହାଯାଇଛି ଯେ, କରୁଣ ନାୟାର ୨୦୨୫ ଚାଂପିଅନ୍ସ ଟ୍ରଫିରେ ତାଙ୍କ ନାମ ସାମିଲ ନକରିବା ପାଇଁ ଚୟନକର୍ତ୍ତାଙ୍କ ଉପରେ ରାଗିଛନ୍ତି । କିନ୍ତୁ ନିକଟରେ, ଟିମ୍ ଇଣ୍ଡିଆର ଚୟନକର୍ତ୍ତା ଅଜିତ ଅଗରକର ଏହି ତାଲିକାରେ ଅନେକ ଖେଳାଳିଙ୍କ ନାମ ସାମିଲ ନ ହେବାର କାରଣ ବ୍ୟାଖ୍ୟା କରିଛନ୍ତି । ଯାହା ପରେ ନାୟାର ଏବେ ତାଙ୍କର ନୀରବତା ଭାଙ୍ଗି ଏକ ବଡ଼ ବୟାନ ଦେଇଛନ୍ତି ।
ଆଗରକର କ’ଣ ବ୍ୟାଖ୍ୟା ଦେଇଥିଲେ?
ଭାରତ ଏବଂ ଇଂଲଣ୍ଡ ମଧ୍ୟରେ ଦିନିକିଆ ସିରିଜ ପୂର୍ବରୁ, ଯେତେବେଳେ କରୁଣ ନାୟାରଙ୍କୁ ଚାଂପିଅନ୍ସ ଟ୍ରଫି ପାଇଁ ଚୟନ କରାଯାଇ ନଥିଲା, ଅଜିତ ଅଗରକର ପରିସ୍ଥିତି ସ୍ପଷ୍ଟ କରିଥିଲେ । ଅଗରକର କହିଥିଲେ, “ବର୍ତ୍ତମାନ ଏହି ଦଳରେ ସ୍ଥାନ ପାଇବା ବହୁତ କଷ୍ଟକର । ଚୟନ ହୋଇଥିବା ଖେଳାଳିମାନଙ୍କୁ ଦେଖନ୍ତୁ । ସମସ୍ତଙ୍କ ହାରାହାରି ରନ ରେଟ୍ ୪୦ରୁ ଅଧିକ । ଦୁର୍ଭାଗ୍ୟବଶତଃ, ଆପଣ ସମସ୍ତଙ୍କୁ ୧୫ ଜଣିଆ ଦଳରେ ସ୍ଥାନ ଦେଇପାରିବେ ନାହିଁ । କିନ୍ତୁ ସେହି ପ୍ରଦର୍ଶନକୁ ନିଶ୍ଚିତ ଭାବରେ ବିଚାରକୁ ନିଆଯାଏ । ଯଦି ଜଣେ ଖେଳାଳିଙ୍କ ଫର୍ମ ଖରାପ ହୁଏ କିମ୍ବା ସେ ଆହତ ହୁଅନ୍ତି, ତେବେ ତାଙ୍କ ବିଷୟରେ ନିଶ୍ଚିତ ଭାବରେ ଆଲୋଚନା ହେବ ।”
କରୁଣ ନାୟାରଙ୍କ ପ୍ରତିକ୍ରିୟା
କରୁଣ ନାୟାର ମଧ୍ୟ ଅଜିତ ଅଗରକରଙ୍କ ବୟାନ ଉପରେ ନିଜର ପ୍ରତିକ୍ରିୟା ଦେଇଛନ୍ତି । ରଣଜୀ ଟ୍ରଫି ସେମିଫାଇନାଲରେ ପହଂଚିବା ପରେ ରେଭସ୍ପୋର୍ଟଜ୍ ସହିତ କଥାବାର୍ତ୍ତା ସମୟରେ ସେ କହିଥିଲେ, “ଏହା ଦେଖି ଭଲ ଲାଗିଲା ଯେ ଏକ ସ୍ପଷ୍ଟ ବିବୃତ୍ତି ଦିଆଯାଇଥିଲା, ଏବଂ ମୁଁ ଭାବୁଛି ସେମାନେ ସେମାନଙ୍କର ଚିନ୍ତାଧାରା କ’ଣ ତାହା ସ୍ପଷ୍ଟ କରିଦେଇଥିଲେ, ଯାହା ଖେଳାଳିଙ୍କୁ ବୁଝିବା ସହଜ କରିଥାଏ ଯେ ତାଙ୍କୁ କେଉଁଠାକୁ ଯିବାକୁ ପଡିବ ଏବଂ ତାଙ୍କୁ କ’ଣ କରିବାକୁ ପଡିବ । ବର୍ତ୍ତମାନ ମୋର ସଂପୂର୍ଣ୍ଣ ଧ୍ୟାନ ରଣଜୀ ଟ୍ରଫି ଜିତିବା ଉପରେ ।”
ଚାଂପିଅନ୍ସ ଟ୍ରଫି ୨୦୨୫ ପାଇଁ ଭାରତୀୟ ଦଳ
ରୋହିତ ଶର୍ମା (ଅଧିନାୟକ), ଶୁଭମନ ଗିଲ (ଉପ-ଅଧିନାୟକ), ବିରାଟ କୋହଲି, ଶ୍ରେୟସ ଆୟର, କେଏଲ ରାହୁଲ (ଉଇକେଟକିପର), ରିଷଭ ପନ୍ତ (ଉଇକେଟକିପର), ହାର୍ଦ୍ଦିକ ପାଣ୍ଡ୍ୟା, ଅକ୍ଷର ପଟେଲ, ୱାଶିଂଟନ ସୁନ୍ଦର, କୁଲଦୀପ ଯାଦବ, ହର୍ଷିତ ରାଣା, ମହମ୍ମଦ ଶାମି, ଅର୍ଶଦୀପ ସିଂହ, ରବିନ୍ଦ୍ର ଜାଡେଜା, ବରୁଣ ଚକ୍ରବର୍ତ୍ତୀ ।
