ଭୁବନେଶ୍ୱର, (ରିପୋଟର୍ସପେନ୍), ସେପ୍ଟେମ୍ବର ୧୩: ପ୍ରେମ ସମ୍ପର୍କକୁ ପରିବାର ଲୋକେ ଗ୍ରହଣ ନକରିବାରୁ ପ୍ରେମିକ ଜଣେ ଏମସିଏ ଛାତ୍ରୀଙ୍କୁ ଅପହରଣ କରି ହତ୍ୟା କରିଥିବା ତାଙ୍କ ପରିବାର ଲୋକେ ଖଣ୍ଡଗିରି ଥାନାରେ ଅଭିଯୋଗ କରିଛନ୍ତି । ପୋଲିସ ଏକ ଆପାର୍ଟମେଂଟର ଆଉଟ୍ହାଉସ୍ରୁ ଯୁବତୀଙ୍କର ଝୁଲନ୍ତା ଶବ ଉଦ୍ଧାର କରି ତଦନ୍ତ ଆରମ୍ଭ କରିଛି ।
ସୂଚନା ଅନୁସାରେ, କୋରାପୁଟ ଜିଲ୍ଲା ଦାମନଯୋଡ଼ି ଥାନା ମାଥାଲପୁଟ ଗାଁର ଏମ୍ସିଏ ଛାତ୍ରୀ ଜ୍ୟୋତିରେଖା ପରିଡ଼ାଙ୍କର ଗଞ୍ଜାମ ବେଲଗୁଣ୍ଠା ବଣତୁମ୍ୱ ଗାଁର ପ୍ରିୟ ରଞ୍ଜନ ପାତ୍ରଙ୍କ ସହ ପ୍ରେମ ସମ୍ପର୍କ ରହିଥିଲା । କିନ୍ତୁ ଏହାକୁ ପରିବାର ଲୋକେ ଗ୍ରହଣ କରିନଥିଲେ । ଯେଉଁଥିପାଇଁ ଉଭୟଙ୍କ ପ୍ରେମରେ ସାମାନ୍ୟ ଭଟ୍ଟା ପଡ଼ିଥିଲା । ସେଥିପାଇଁ ଜ୍ୟୋତିରେଖାଙ୍କ ପରିବାର ଲୋକଙ୍କୁ ଅନେକ ସମୟରେ ଧମକଚମକ ମିଳୁଥିଲା । ପରେ ଜ୍ୟୋତିରେଖାଙ୍କୁ ପରିବାର ଲୋକ ତାଙ୍କ ସଂପର୍କୀୟ ଘର ଭବାନୀପାଟଣାରେ ଛାଡ଼ିଦେଇଥିଲେ । ଗତ ଫେବ୍ରୁଆରୀରେ ପ୍ରିୟରଞ୍ଜନ ଓ ତାଙ୍କର ଦୁଇ ଜଣ ସାଥୀ ଭବାନୀପାଟଣା ଯାଇଥିଲେ । ଆଉ ସେଠାରୁ ଜ୍ୟୋତିରେଖାଙ୍କୁ ଅପହରଣ କରିଥିଲେ । ଅପହରଣ ନେଇ ସେତେବେଳେ ଥାନାରେ ଲିଖିତ ଅଭିଯୋଗ ହୋଇଥିଲା ।
ଅପହରଣ ପରେପ୍ରିୟ ରଞ୍ଜନ ତାଙ୍କୁ ନିଜ ଘରକୁ ନେଇନଥିଲେ । ପରେ ରାଜଧାନୀ ଭୁବନେଶ୍ୱରରେ ଏଠି ସେଠି ଘର ଭଡ଼ା ନେଇ ରହୁଥିଲେ । ତେବେ ରାକ୍ଷୀ ପୂର୍ଣ୍ଣିମାଠାରୁ ଉଭୟରେ ଖଣ୍ଡଗିରିରେ ଥିବା ଏକ ଆପାର୍ଟମେଂଟର ଆଉଟ୍ହାଉସରେ ରହୁଥିଲେ । ଆପାର୍ଟମେଂଟରେ ରହୁଥିବା ଲୋକଙ୍କ କହିବା ଅନୁସାରେ ଜ୍ୟୋତିରେଖା ଓ ତାଙ୍କ ପ୍ରେମିକ ପ୍ରିୟଙ୍କୁ ଦିନ ବେଳାରେ କେବେ ଦେଖିବାକୁ ପାଆନ୍ତି ନାହିଁ । ତେବେ ଗୁରୁବାର ରାତିରେ ଆପାର୍ଟମେଂଟ ସୋସାଇଟି ମେମ୍ୱରମାନେ ଆଉଟ୍ହାଉସ୍ରେ ଝୁଲନ୍ତା ମୃତଦେହ ଦେଖି ଖଣ୍ଡଗିରି ଥାନା ପୋଲିସ୍କୁ ଖବର ଦେଇଥିଲେ ।
କମିଶନରେଟ୍ ପୋଲିସ୍ ଆଉଟ୍ହାଉସ୍ରେ ପହଂଚି ଝୁଲନ୍ତା ମୃତଦେହ ଜବତ କରିଥିଲା । ହେଲେ ଘରେ ପ୍ରେମିକ ପ୍ରବର ପ୍ରିୟରଞ୍ଜନଙ୍କୁ ଦେଖିବାକୁ ମିଳିନଥିଲା । ପୋଲିସ୍ ଘରୁ ଭିତରୁ ଗୋଟିଏ ଆପିଡେଭିଟ୍ ଜବତ କରିଥିଲା । ଯେଉଁ ତଥ୍ୟ ଆଧାରରେ ପୋଲିସ୍ ସୁନାବେଡ଼ା ଥାନାକୁ ସୂଚନା ଦେଇଥିଲା । ରାତି ପ୍ରାୟ ୨ଟା ବେଳେ ସୁନାବେଡ଼ା ଥାନା ପୋଲିସ୍ ଜ୍ୟୋତିରେଖାଙ୍କ ବାପା ମଙ୍ଗୁଳୁ ପରିଡ଼ାଙ୍କୁ ଝିଅ ମୃତ୍ୟୁ ନେଇ ଖବର ଦେଇଥିଲା ।
ଝିଅ ମୃତ୍ୟୁ ଖବର ଶୁଣି ତାଙ୍କ ପରିବାର ଲୋକଙ୍କ ହୋସ ଉଡିଯାଇଥିଲା । ସେମାନେ ଭୁବନେଶ୍ୱରରେ ପହଂଚି ଝିଅର ଝିଲନ୍ତା ମୃତଦେହ ଦେଖି ବିଶ୍ୱାସ କରିପାରିଲେ ନାହିଁ । ଜ୍ୟୋତିରେଖାଙ୍କ ବାପାଙ୍କ କହିବା ଅନୁସାରେ ସିଏ(ଜ୍ୟୋତିରେଖା) ଆତ୍ମହତ୍ୟା କରିନି । ତାକୁ ମାରି ଟାଙ୍ଗି ଦିଆଯାଇଛି । ଯିଏ ଝୁଲିକି ଆତ୍ମହତ୍ୟା କରିବ, ସିଏ କ’ଣ ଟେବୁଲ୍ ଉପରେ ବସିକି ଆତ୍ମହତ୍ୟା କରିବ କି ବୋଲି ପ୍ରଶ୍ନ କରିଛନ୍ତି । ପୋଲିସ ପରିବାର ଲୋକଙ୍କ ବୟାନ ରେକର୍ଡ କରି ଘଟଣାର ତଦନ୍ତ କରୁଛି ।
