ଭୁବନେଶ୍ୱର, (ରିପୋଟର୍ସ ପେନ୍): ପୋଲିସ ନିଶା ବେପାରିକୁ ଧରିବାକୁ ଯାଇଥିବ ବେଳେ ଏକ ଅଘଟଣ ଘଟିିିଛି । ପୋଲିସ ହାବୁଡିରୁ ଖସିବା ଲାଗି ଦୌଡି ପଳାଉଥିବା ବେଳେ ଟ୍ରକ୍ ଧକ୍କାରେ ଜଣେ ନିଶା ମାଫିଆର ମୃତ୍ୟୁ ଘଟିଛି । ମୃତ ନିଶା ମାଫିଆ ଜଣକ ଜୋହନ ରହିତା । ଏନେଇ ଇନଫୋଭ୍ୟାଲି ଥାନା ପୋଲିସ ଏକ ମାମଲା ରୁଜୁ କରି ତଦନ୍ତ କରଛି । ଅନ୍ୟପକ୍ଷରେ ନିଶା କାରବାର ମାମଲାରେ ପୋଲିସ ୪ଜଣଙ୍କୁ ଗିରଫ କରିବା ସହ ୭୫ କିଲୋ ଗଞ୍ଜେଇ ଜବତ କରାଯାଇଛି । ଗିରଫ ଅଭିଯୁକ୍ତମାନେ ହେଲେ ଗଜପତି ଜିଲ୍ଲାର ବାବୁଲା ଶବର, ଖୋର୍ଦ୍ଧା ଗୁରୁଜଙ୍ଗରେ ରହୁଥିବା ବିଭୂପ୍ରସାଦ ଆଚାର୍ଯ୍ୟ, ଚନ୍ଦନ ଘଡାଇ, ନୟାଗଡ ଓଡଗାଁର ବବୁଲ ବରାଦ । ପୋଲିସ ଏମାନଙ୍କୁ କୋର୍ଟ ଚାଲାଣ କରିଥିବା ବେଳେ ଫେରାର ଅଭିଯୁକ୍ତକୁ ଧରିବା ଲାଗି ଉଦ୍ୟମ ଚଳାଇଛି ।
ପୋଲିସ ସୂଚନା ଅନୁସାରେ, ରାଜଧାନୀ ଭୁବନେଶ୍ୱର ଓ କଟକରେ ନିଶା ଅପରାଧ ରୋକିବା ଲାଗି କମିଶନରେଟ ପୋଲିସର ସ୍ପେଶାଲ କ୍ରାଇମ ୟୁନିଟ ଅଭିଯାନ ଚଳାଇଛି । ଏହି କ୍ରମରେ ଗତକାଲି ରାଜଧାନୀ ଉପକଣ୍ଠ ୧୬ ନମ୍ବର ଜାତୀୟ ରାଜପଥର ଗଙ୍ଗପଡା ନିକଟରେ ସ୍ପେଶାଲ କ୍ରାଇମ ୟୁନିଟ ଟିମ ପାଟୋଲଂ କରୁଥିଲା । ଏହି ସମୟରେ ଜାତୀୟ ରାଜପଥର ଅନତୀଦୂରରେ ଏକ ଇଣ୍ଡିକା କାର ଠିଆ ହୋଇଥିବା ଦେଖିଥିଲେ । କାର ପାଖରେ ୬ଜଣ ଯୁବକ ସନ୍ଦେହଜନକ ଭାବେ ବୁଲୁଥିବା ନଜରକୁ ଆସିବା ପରେ ପୋଲିସ ସେଠାରେ ଚଢାଉ କରିଥିଲା ।
ପୋଲିସକୁ ଦେଖି ନିଶା ବେପାରିମାନେ ଦୌଡି ପଳାଇବାକୁ ଚେଷ୍ଠା କରିଥିଲେ । ପୋଲିସ ପିଛା କରି ୪ଜଣଙ୍କୁ କାବୁ କରିଥିଲା । ତେବେ ନିଶା କାରବାରର ମାଷ୍ଟରମାଇଣ୍ଡ ପୋଲିସକୁ ଚକମା ଦେଇ ଖସି ଯାଇଥିବା ବେଳେ ଜାତୀୟ ରାଜପଥ ଉପରେ ଏକ ଟ୍ରକ ଧକ୍କାର ଶିକାର ହୋଇଥିଲା । ଗୁରୁତର ଅବସ୍ଥାରେ ପୋଲିସ ତାକୁ ଖୋର୍ଦ୍ଧା ମେଡିକାଲରେ ଭର୍ତ୍ତି କରିଥିଲା । ସେଠାରେ ତା’ର ମୃତ୍ୟୁ ଘଟିଥିଲା । ପୋଲିସ ହାତରେ ଧରାପଡିଥିବା ଅଭିଯୁକ୍ତଙ୍କୁ ଜେରା ପରେ କାର ଭିତରୁ ୭୫ କିଲୋ ଗଞ୍ଜେଇ ଜବତ କରାଯାଇଛି । ଏମାନେ ନିୟମିତ ଭାବେ ନିଶା କାରବାର କରୁଥିବା ପୋଲିସ ଆଗରେ ସ୍ୱିକାର କରିଛନ୍ତି । ଘଟଣାର ଅଧିକ ତଦନ୍ତ ଲାଗି ଅଭିଯୁକ୍ତଙ୍କୁ ରିମାଣ୍ଡରେ ଅଣାଯିବ ବୋଲି ପୋଲିସ କହିଛି ।
