Terrorist Arrest: ପଶ୍ଚିମବଙ୍ଗର ଦକ୍ଷିଣ ୨୪ ପରଗାଣା ଜିଲ୍ଲାରେ ଜଣେ ଖତରନାକ ଆତଙ୍କବାଦୀଙ୍କୁ ଗିରଫ କରାଯାଇଛି। ଜମ୍ମୁ କାଶ୍ମୀର ପୋଲିସ ଏବଂ ବେଙ୍ଗାଲୁରୁ ପୋଲିସର ଏସଟିଏଫ ଟିମ୍ କାଶ୍ମୀର ଆତଙ୍କବାଦୀ ଜାଭେଦ୍ ମୁନ୍ସିଙ୍କୁ କ୍ୟାନିଂ ହସ୍ପିଟାଲ ନିକଟରୁ ଗିରଫ କରିଛି। କହିରଖୁଛୁ ଜାଭେଦ୍ ମୁନ୍ସି କାଶ୍ମୀରରେ ନିଷିଦ୍ଧ ତେହେରିକ୍-ଇ-ମୁଜାହିଦ୍ଦିନ ସଂଗଠନର ସଦସ୍ୟ ବୋଲି କୁହାଯାଉଛି। ସେ ଅନେକ ବିଦ୍ରୋହୀ କାର୍ଯ୍ୟକଳାପରେ ଜଡିତ ରହିଛନ୍ତି। ଜମ୍ମୁ କାଶ୍ମୀର ପୋଲିସ ଦୀର୍ଘ ଦିନ ଧରି ଜାଭେଦ୍ ମୁନ୍ସିଙ୍କୁ ଖୋଜୁଥିଲା।
ଖବର ଅନୁଯାୟୀ ଜାଭେଦ୍ ମୁନ୍ସି ଜଣେ ଖତରନାକ IED ଏକ୍ସପର୍ଟ ଏବଂ ଅସ୍ତ୍ରଶସ୍ତ୍ର ସଂଚାଳକ। ସେ ୨୦୧୧ ରେ ଅହଲ-ଇ-ହାଦିଥ ନେତା ଶୈକତ ଶାହାଙ୍କ ହତ୍ୟାରେ ସମ୍ପୃକ୍ତ ଥିଲେ। ଆତଙ୍କବାଦ ସମ୍ବନ୍ଧୀୟ ଅଭିଯୋଗରେ ତାଙ୍କୁ ଅନେକ ଥର ଜେଲ ଦଣ୍ଡାଦେଶ ହୋଇଛି। ପଚରାଉଚରା ବେଳେ ଆତଙ୍କବାଦୀ ଜାଭେଦ୍ ମୁନ୍ସି ବାଂଲାଦେଶ, ନେପାଳ ଏବଂ ପାକିସ୍ତାନକୁ ଏକ ନକଲି ପାକିସ୍ତାନୀ ପାସପୋର୍ଟରେ ତାଙ୍କ କମାଣ୍ଡରଙ୍କ ନିର୍ଦ୍ଦେଶରେ ଯାତ୍ରା କରିଥିବା ସ୍ୱୀକାର କରିଛନ୍ତି। ପୋଲିସର ସୂଚନାନୁସାରେ ତେହେରିକ-ଏ-ମୁଜାହିଦ୍ଦିନ ପାକିସ୍ତାନରୁ ନିୟନ୍ତ୍ରିତ ଏବଂ ପାକିସ୍ତାନ ଏବଂ ବାଂଲାଦେଶର ଅନ୍ୟ ଆତଙ୍କବାଦୀ ସଂଗଠନ ସହ ଏହାର ସମ୍ପର୍କ ରହିଛି।
ଆତଙ୍କବାଦୀଙ୍କୁ ଗିରଫ କରାଯିବା ପରେ ସରକାରୀ ଓକିଲ ବିକାଶ କହିଛନ୍ତି ଯେ ଜମ୍ମୁ କାଶ୍ମୀରର ଶ୍ରୀନଗରରୁ ପୋଲିସ ଟ୍ରାଞ୍ଜିଟ୍ ରିମାଣ୍ଡ ନେବାକୁ ଏଠାକୁ ଆସିଛି। ସରକାରୀ ଓକିଲ କହିଛନ୍ତି – “ଜାଭେଦ ଅହମ୍ମଦ ମୁନ୍ସି ନାମକ ଜଣେ ୫୮ ବର୍ଷୀୟ ବ୍ୟକ୍ତି। ଯିଏ ମୁସଲିମ ଲିଗକୁ ପୁନର୍ଜୀବିତ କରିବା ଉଦ୍ଦେଶ୍ୟରେ କାର୍ଯ୍ୟ କରୁଥିଲେ। ୩୧ ଡିସେମ୍ବର ପର୍ଯ୍ୟନ୍ତ କୋର୍ଟ ଟ୍ରାଞ୍ଜିଟ ରିମାଣ୍ଡରେ ନେବାକୁ ନିର୍ଦ୍ଦେଶ ଦେଇଛନ୍ତି। ଆତଙ୍କବାଦୀଙ୍କ ନିକଟରୁ ପୋଲିସ ଏକ ବହି ଉଦ୍ଧାର କରିଛି। ଏକ ସିଡି, ଏକ ପ୍ଲାଷ୍ଟିକ ବ୍ୟାଗ ଏବଂ ଅନେକ ଡକ୍ୟୁମେଣ୍ଟ ମଧ୍ୟ ଜବତ କରାଯାଇଛି।
ସୂଚନା ଅନୁଯାୟୀ ଆତଙ୍କବାଦୀ ଜାଭେଦ୍ ମୁନ୍ସିଙ୍କୁ ଆଲିପୋର କୋର୍ଟରେ ହାଜର କରାଯାଇଥିଲା। ଯେଉଁଠାରୁ ତାଙ୍କୁ ଟ୍ରାଞ୍ଜିଟ୍ ରିମାଣ୍ଡରେ ପଠାଯାଇଛି। ଅଧିକ ତଦନ୍ତ ପାଇଁ ଆତଙ୍କବାଦୀଙ୍କୁ ଜମ୍ମୁ କାଶ୍ମୀର ପୋଲିସକୁ ହସ୍ତାନ୍ତର କରାଯାଇଛି। ଟ୍ରାଞ୍ଜିଟ୍ ରିମାଣ୍ଡରେ ନେବା ପରେ ପୋଲିସ କାଶ୍ମୀରକୁ ଫେରିବ।
