Womens T20 World Cup 2024: ଆନ୍ତର୍ଜାତୀୟ କ୍ରିକେଟ୍ ପରିଷଦ (ICC) (୧୭ ସେପ୍ଟେମ୍ୱର) ମଙ୍ଗଳବାର ଏକ ଐତିହାସିକ ନିଷ୍ପତ୍ତି ସମ୍ପର୍କରେ ଘୋଷଣା କରିଛି। ଏହି ଘୋଷଣା ଅନୁଯାୟୀ ବର୍ତ୍ତମାନ ବିଶ୍ୱକପରେ ପୁରୁଷ ଓ ମହିଳା ଖେଳାଳିଙ୍କୁ ସମାନ ପୁରସ୍କାର ରାଶି ମିଳିବ । ଆସନ୍ତା ମାସରେ ୟୁଏଇରେ ଅନୁଷ୍ଠିତ ହେବାକୁ ଥିବା ମହିଳା ଟି -20 ବିଶ୍ୱକପରୁ ଏହା ଆରମ୍ଭ ହେବ ବୋଲି ଆଇସିସି କହିଛି ।
ଆଇସିସି ପକ୍ଷରୁ ଜାରୀ ହୋଇଥିବା ବିବୃତ୍ତି ଅନୁଯାୟୀ, ମହିଳା ଟି -୨୦ ବିଶ୍ୱକପ ବିଜେତାଙ୍କୁ ୨.୩୪ ମିଲିୟନ ଆମେରିକୀୟ ଡଲାର (ପ୍ରାୟ ୨୦ କୋଟି ଟଙ୍କା) ପୁରସ୍କାର ପ୍ରଦାନ କରାଯିବ । ଯାହା ଅଷ୍ଟ୍ରେଲିଆକୁ ଦିଆଯାଇଥିବା ୧ ମିଲିୟନ ଡଲାର (ପ୍ରାୟ ୨୦ କୋଟି ଟଙ୍କା) ସହିତ ସମାନ । ଚଳିତ ବର୍ଷ ପ୍ରାରମ୍ଭରେ ପୁରୁଷ ଟି -୨୦ ବିଶ୍ୱକପ ଜିତିବା ପାଇଁ ଭାରତ ୨.୪୫ ମିଲିୟନ ଡ଼ଲାର (୨୦ କୋଟି ୫୦ ଲକ୍ଷ) ଟଙ୍କା ପୁରସ୍କାର ପାଇଥିଲା। ଆଇସିସି କହିଛି, ଆଇସିସି ମହିଳା ଟି -୨୦ ବିଶ୍ୱକପ ୨୦୨୪ ପ୍ରଥମ ଆଇସିସି ଟୁର୍ନାମେଣ୍ଟ ହେବ ଯେଉଁଥିରେ ମହିଳାମାନେ ପୁରୁଷଙ୍କ ଭଳି ସମାନ ପୁରସ୍କାର ରାଶି ପାଇବେ । ଯାହାକି ଏହି ଖେଳ ଇତିହାସରେ ଗୁରୁତ୍ୱପୂର୍ଣ୍ଣ ସଫଳତା ହେବ ।
ଆଇସିସି ଅଧ୍ୟକ୍ଷ ଗ୍ରେଗ ବାରକଲେ କହିଛନ୍ତି ଯେ, ଖେଳ ଇତିହାସରେ ଏହା ଏକ ଗୁରୁତ୍ୱପୂର୍ଣ୍ଣ ମୁହୂର୍ତ୍ତ ଏବଂ ଏହି ନିଷ୍ପତ୍ତିକୁ ନେଇ ମୁଁ ଅତ୍ୟନ୍ତ ଖୁସି । ଆଇସିସି ବିଶ୍ୱ ଇଭେଣ୍ଟରେ ଅଂଶଗ୍ରହଣ କରୁଥିବା ପୁରୁଷ ଏବଂ ମହିଳା କ୍ରିକେଟରଙ୍କୁ ବର୍ତ୍ତମାନ ସମାନ ପୁରସ୍କାର ଦିଆଯିବ। ୨୦୧୭ ଠାରୁ, ଆମେ ସମାନ ପୁରସ୍କାର ରାଶି ହାସଲ କରିବାର ସ୍ପଷ୍ଟ ଲକ୍ଷ୍ୟ ସହିତ ପ୍ରତିବର୍ଷ ମହିଳା ଇଭେଣ୍ଟରେ ପୁରସ୍କାର ରାଶି ବୃଦ୍ଧି କରିଛୁ ଏବଂ ବର୍ତ୍ତମାନଠାରୁ ଆଇସିସି ମହିଳା କ୍ରିକେଟ୍ ବିଶ୍ୱକପ୍ ଜିତିବା ପାଇଁ ପୁରସ୍କାର ରାଶି ଆଇସିସି ପୁରୁଷ କ୍ରିକେଟ୍ ବିଶ୍ୱ ଜିତିବା ସହିତ ସମାନ ହେବ । ଟି -୨୦ ବିଶ୍ୱକପ୍ ଏବଂ ଅଣ୍ଡର -୧୯ ପାଇଁ ପୁରସ୍କାର ରାଶି ମଧ୍ୟ ସମାନ ହେବ ।
ଆଇସିସି ମହିଳା ଟି -୨୦ ବିଶ୍ୱକପ ୨୦୨୦ ଏବଂ ୨୦୨୩ ର ବିଜେତା ତଥା ରନର୍ ଅପ୍ ଯଥାକ୍ରମେ ୧ ମିଲିୟନ୍ ଏବଂ ୫୦୦,୦୦୦ ଡଲାର୍ ପାଇଥିଲେ, ଯାହା ୨୦୧୮ ରେ ଦିଆଯାଇଥିବା ପରିମାଣଠାରୁ ପାଞ୍ଚ ଗୁଣ ଅଧିକ । ଆଇସିସି ମହିଳା କ୍ରିକେଟ୍ ବିଶ୍ୱକପ୍ ୨୦୨୨ ପାଇଁ ପୁରସ୍କାର ରାଶି ମଧ୍ୟ ୨ ମିଲିୟନ୍ ଡଲାରରୁ ୩.୫ ମିଲିୟନ୍ ଡଲାରକୁ ବୃଦ୍ଧି କରାଯାଇଥିଲା, ଯାହା ଇଂଲଣ୍ଡରେ ୨୦୧୭ରେ ମ୍ୟାଚ୍ ଜିତିବା ପାଇଁ ପ୍ରଦାନ କରାଯାଇଥିଲା ।
