ଟାଇଟଲ ଜିତିବା ପାଇଁ ଭାରତ ଏକ ଯୋଗ୍ୟ ଦଳ : ଶୋଏବ
ଟିମ୍ ଇଣ୍ଡିଆ ଟି-୨୦ ବିଶ୍ୱକପ ୨୦୨୪ ସେମିଫାଇନାଲରେ ଇଂଲଣ୍ଡକୁ ପରାସ୍ତ କରି ଫାଇନାଲ ପାଇଁ ନିଜ ଟିକେଟ୍ ପକ୍କା କରିଛି। ବର୍ତ୍ତମାନ ଭାରତ ଟି-୨୦ କ୍ରିକେଟର ଚାମ୍ଫିୟନ ହେବାଠାରୁ ମାତ୍ର ଗୋଟିଏ ପାଦ ଦୂରରେ ଅଛି। ଶନିବାର ଦିନ (୨୯ ଜୁନ୍) ଭାରତକୁ ଦକ୍ଷିଣ ଆଫ୍ରିକା ବିପକ୍ଷରେ ଟାଇଟଲ ମ୍ୟାଚ୍ ଖେଳିବାକୁ ପଡିବ। ଏହି ମ୍ୟାଚକୁ ଜିତି ଭାରତୀୟ ଦଳ ଦୀର୍ଘ ବର୍ଷ ଧରି ଖାଲି ପଡିଥିବା ଆଇସିସି ବିଶ୍ୱକପ ଟ୍ରଫିକୁ ହାତେଇବାକୁ ଚେଷ୍ଟା କରିବ। ପାକିସ୍ତାନର ପୂର୍ବତନ ଦ୍ରୁତ ବୋଲର ଶୋଏବ ଅଖତର ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ହେବାକୁଥିବା ଏହି ଫାଇନାଲ ମ୍ୟାଚକୁ ନେଇ ନିଜର ପ୍ରତିକ୍ରିୟା ରଖିଛନ୍ତି। ଶୋଏବ ଭାରତର ବିଜୟ କାମନା କରିବା ସହ ଅଧିନାୟକ ରୋହିତ ଶର୍ମାଙ୍କୁ ମଧ୍ୟ ପ୍ରଶଂସା କରିଛନ୍ତି।
ଶୋଏବ ଅଖତର ନିଜ ୟୁଟ୍ୟୁବ ଚ୍ୟାନେଲରେ ଟି-୨୦ ବିଶ୍ୱକପ୍ର ଫାଇନାଲ୍ ମ୍ୟାଚକୁ ନେଇ ନିଜର ମତ ରଖିଛନ୍ତି। ଶୋଏବ କହିଛନ୍ତି ଯେ ଏଥର ଟାଇଟଲ ଜିତିବା ପାଇଁ ଭାରତ ଏକ ଯୋଗ୍ୟ ଦଳ। ଗତ ବର୍ଷ ମଧ୍ୟ ଭାରତ ଏକଦିବସୀୟ ବିଶ୍ୱକପରେ ଚାମ୍ପିୟନ ହେବାକୁ ଯୋଗ୍ୟ ଥିଲା। କିନ୍ତୁ ଦଳକୁ ପରାଜୟର ସାମ୍ନା କରିବାକୁ ପଡିଥିଲା। ସେହି ମ୍ୟାଚରେ ଭାରତ ମଧ୍ୟ ଜିତିବା ଉଚିତ୍। ରୋହିତ ଶର୍ମାଙ୍କ ପରି ଜଣେ ଅଧିନାୟକ ନିଶ୍ଚିତ ଭାବେ ବିଶ୍ୱକପ ଟାଇଟଲ ପାଇବାକୁ ଯୋଗ୍ୟ। ତାଙ୍କର ଏକ ସ୍ୱପ୍ନ ମଧ୍ୟ ଅଛି, ଯାହାକୁ ସେ ଦୁଇଥର ହରାଇଛନ୍ତି। କିନ୍ତୁ ଏଥର ସେ ନିଶ୍ଚିତ ଭାବେ ବିଶ୍ୱକପ ଟ୍ରଫି ଉଠାଇବେ।
ଶୋଏବ ଅଖତର କହିଛନ୍ତି ଯେ ବିରାଟ କୋହଲି ଜଣେ ନେଚୁରାଲ ଓପନର୍ ନୁହଁନ୍ତି। ସେ ନିଜ ବ୍ୟାଟିଂ କ୍ରମରେ (ନମ୍ବର-୩) ଖେଳିବା ଉଚିତ୍। ଏହି ସମୟରେ ସେ ଦଳର ଷ୍ଟ୍ରାଇକ୍ ରେଟ୍ ଠିକ୍ ପରିଚାଳନା କରନ୍ତି, ଆଗକୁ ବଢ଼ନ୍ତି ଏବଂ ଭଲ ଖେଳନ୍ତି। ଫାଇନାଲରେ ବିରାଟ କୋହଲି ନିଜ ବ୍ୟାଟିଂ କ୍ରମରେ ଖେଳିବା ଉଚିତ ଏବଂ ଋଷଭ ପନ୍ତ ଓ ରୋହିତ ଶର୍ମା ଇନିଂସ ଓପନ୍ କରିବା ଉଚିତ୍।
ପାକିସ୍ତାନର ଏହି ପୂର୍ବତନ ଦ୍ରୁତ ବୋଲର ଆହୁରି କହିଛନ୍ତି, “ଫାଇନାଲରେ ଭାରତକୁ ଦେଖି ମୁଁ ବହୁତ ଖୁସି। ଏହା ଏକ ଯୋଗ୍ୟ ଦଳ। ଯେଉଁ ଦଳରେ ରୋହିତ ଶର୍ମାଙ୍କ ଭଳି ଜଣେ ଶକ୍ତିଶାଳୀ ବ୍ୟାଟ୍ସମ୍ୟାନ୍ ଅଛନ୍ତି, ସେ ଚାମ୍ପିୟନ ହେବାକୁ ଯୋଗ୍ୟ। ରୋହିତ ଶର୍ମାଙ୍କ ବ୍ୟତୀତ ହାର୍ଦ୍ଦିକ ପାଣ୍ଡ୍ୟା ଏବଂ ସୂର୍ଯ୍ୟକୁମାରଙ୍କ ଭଳି ମ୍ୟାଚ ବିଜେତା ଖେଳାଳି ଦଳକୁ ବହୁତ ଦୂରକୁ ନେଇଯାଆନ୍ତି। ଦୁନିଆରେ ରୋହିତ ଶର୍ମାଙ୍କ ପରି କୌଣସି ବ୍ୟାଟ୍ସମ୍ୟାନ୍ ନାହାଁନ୍ତି।”
ପ୍ରଥମ ଥର ପାଇଁ ଫାଇନାଲରେ ପ୍ରବେଶ କରିଥିବାରୁ ଶୋଏବ ଅଖତର ଦକ୍ଷିଣ ଆଫ୍ରିକାକୁ ଅଭିନନ୍ଦନ ଜଣାଇଛନ୍ତି। କହିଛନ୍ତି, “ଫାଇନାଲରେ ପହଞ୍ଚିବା ପାଇଁ ଅଭିନନ୍ଦନ। ଯଦି ଆପଣ ମ୍ୟାଚରେ ରହିବାକୁ ଚାହୁଁଛନ୍ତି, ତେବେ ପ୍ରଥମେ ବ୍ୟାଟିଂ କରନ୍।| ଯଦି ଆପଣ ୧୫୦ ରନ୍ ସ୍କୋର କରନ୍ତି, ତେବେ ମ୍ୟାଚ୍ ପ୍ରତିଯୋଗିତାପୂର୍ଣ୍ଣ ହେବ। ଯଦି ଆପଣ ପ୍ରଥମେ ଭାରତକୁ ବ୍ୟାଟିଂ କରିବାକୁ ଦିଅନ୍ତି, ସେମାନଙ୍କ ସ୍ପିନରମାନେ ଆପଣଙ୍କୁ ମ୍ୟାଚ୍ ଜିତିବାକୁ ଦେବେ ନାହିଁ।”