ନୂଆଦିଲ୍ଲୀ: ଲୋକସଭା ସଦସ୍ୟତା ଫେରି ପାଇବା ପରେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଏକ ସରକାରୀ ବଙ୍ଗଳା ବଣ୍ଟନ କରାଯାଇଛି । ମଙ୍ଗଳବାର ଦିନ ଲୋକସଭାର ଗୃହ କମିଟି ରାହୁଲଙ୍କୁ ତାଙ୍କର ପୁରୁଣା ୧୨ ତୁଗଲକ୍ ଲେନ୍ ବଙ୍ଗଳା ବଣ୍ଟନ କରିଛି । ଅଗଷ୍ଟ ୪ ଶୁକ୍ରବାର ଦିନ ମୋଦୀ ଉପନାମ ସମ୍ପର୍କରେ ଦେଇଥିବା ମନ୍ତବ୍ୟ ପାଇଁ ସୁପ୍ରିମକୋର୍ଟ ତାଙ୍କ ଦଣ୍ଡାଦେଶ ଉପରେ ରୋକ ଲଗାଇଥିଲେ ।
ଲୋକସଭା ସଦସ୍ୟତା ହରାଇବା ପରେ ରାହୁଲ ଗାନ୍ଧୀ ଏପ୍ରିଲରେ ତାଙ୍କ ମା’ ସୋନିଆ ଗାନ୍ଧୀଙ୍କ ବାସଭବନକୁ ଯାଇଥିଲେ । ତା’ପରେ ରାହୁଲ ଗାନ୍ଧୀ କହିଥିଲେ ଯେ ସେ ସତ କହିବା ପାଇଁ ଦଣ୍ଡର ସମ୍ମୁଖୀନ ହେଉଛନ୍ତି । କିନ୍ତୁ ସେ ଲୋକଙ୍କ ସ୍ୱର ଉତ୍ତୋଳନ କରିବେ । ଯେତେବେଳେ ଗଣମାଧ୍ୟମ ରାହୁଲ ଗାନ୍ଧୀଙ୍କୁ ବଙ୍ଗଳା ଫେରାଇ ଆଣିବା ବିଷୟରେ ପଚାରିଲା, ସେତେବେଳେ ସେ କହିଥିଲେ ଯେ ସମଗ୍ର ଭାରତ ମୋର ଘର । ଲୋକସଭାର ସଦସ୍ୟତା ଫେରି ପାଇବା ପରେ କଂଗ୍ରେସ ନେତା ରାହୁଲ ଗାନ୍ଧୀ ସୋମବାର ଗୃହର ବୈଠକରେ ଯୋଗ ଦେଇଥିଲେ ।
ସୋମବାର ତାଙ୍କ ଲୋକସଭା ସଦସ୍ୟତା ଫେରି ପାଇବା ସମ୍ପର୍କରେ ଲୋକସଭା ସଚିବଙ୍କ ଦ୍ୱାରା ବିଜ୍ଞପ୍ତି ଜାରି କରାଯାଇଥିଲା । ସୋମବାର ମଧ୍ୟାହ୍ନ ୧୨ ଟାରୁ ଲୋକସଭା ସଭା ଆରମ୍ଭ ହୋଇଥିବାବେଳେ ରାହୁଲ ଗାନ୍ଧୀ ଏହି ପ୍ରକ୍ରିୟାରେ ଭାଗ ନେବାକୁ ପହଞ୍ଚିଥିଲେ । ରାହୁଲ ସଂସଦରେ ପହଞ୍ଚିବା ପରେ ତାଙ୍କ ଦଳର ସାଂସଦ ତଥା ଅନ୍ୟ କିଛି ସହଯୋଗୀ ତାଙ୍କୁ ସ୍ୱାଗତ କରିଥିଲେ ଏବଂ ତାଙ୍କ ସମର୍ଥନରେ ସ୍ଲୋଗାନ ଦେଇଥିଲେ ।
