ହାଇଦ୍ରାବାଦ: ଆଜିଠାରୁ ଆରମ୍ଭ ହେବାକୁ ଯାଉଛି ହାଇଦ୍ରାବାଦ ଟେଷ୍ଟ। ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡ଼ିୟମରେ ଭାରତ ଏବଂ ଇଂଲଣ୍ଡ ମଧ୍ୟରେ ପ୍ରଥମ ଟେଷ୍ଟ ମ୍ୟାଚ ଖେଳାଯିବ। ପ୍ରାୟ ୬ ବର୍ଷ ପରେ ହାଇଦ୍ରାବାଦରେ ଏକ ଆନ୍ତର୍ଜାତୀୟ ଟେଷ୍ଟ ମ୍ୟାଚ୍ ଖେଳାଯାଉଛି। ଶେଷ ଥର ପାଇଁ ଟିମ୍ ଇଣ୍ଡିଆ ୨୦୧୮ରେ ୱେଷ୍ଟଇଣ୍ଡିଜ୍ ସହିତ ଏହି ଗ୍ରାଉଣ୍ଡରେ ଏକ ଟେଷ୍ଟ ମ୍ୟାଚ୍ ଖେଳିଥିଲା। ଏହି ମ୍ୟାଚରେ ଟିମ୍ ଇଣ୍ଡିଆ ଏକ ଚମତ୍କାର ବିଜୟ ହାସଲ କରିଥିଲା। ବର୍ତ୍ତମାନ ୬ ବର୍ଷ ପରେ ଟିମ୍ ଇଣ୍ଡିଆ ଏହି ଗ୍ରାଉଣ୍ଡରେ ଟେଷ୍ଟ ମ୍ୟାଚ୍ ଖେଳିବାକୁ ପ୍ରସ୍ତୁତ। ଏଥର ଦଳ ରୋହିତ ଶର୍ମାଙ୍କ ନେତୃତ୍ୱରେ ମୈଦାନକୁ ଓହ୍ଲାଇବ।
କାହାକୁ ମିଳିବ ଫାଇଦା
ଏହି ମ୍ୟାଚ୍ ପୂର୍ବରୁ ପିଚ୍ ବିଷୟରେ ଅନେକ ଆଲୋଚନା ପର୍ଯ୍ୟାଲୋଚନା କରାଯାଇଥିଲା। ହାଇଦ୍ରାବାଦ ପିଚରେ ସ୍ପିନରମାନଙ୍କୁ ବହୁମାତ୍ରା ଲାଭ ମିଳିବ ବୋଲି କ୍ରିକେଟ ଏକ୍ସପର୍ଟମାନେ ସୂଚନା ପ୍ରଦାନ କରିଛନ୍ତି। ଯେଉଁଥିପାଇଁ ଇଂଲଣ୍ଡ ତାର ଚୁଡ଼ାନ୍ତ ଏକାଦଶରେ ତିନି ଜଣ ସ୍ପିନରଙ୍କୁ ସାମିଲ କରିଛି। ଏହା ବ୍ୟତୀତ ଦ୍ରୁତ ବୋଲରମାନେ ପିଚ୍ରୁ କିଛି ସାହାଯ୍ୟ ପାଇବାର ସମ୍ଭାବନା ରହିଛି। ଅନ୍ୟପକ୍ଷରେ ହାଇଦ୍ରାବାଦର ପାଗ ମଧ୍ୟ ସୁହାଇଲା ଭଳି ରହିବ। ଏଭଳି ପରିସ୍ଥିତିରେ ଦର୍ଶକ ଏକ ରୋମାଞ୍ଚକର ମ୍ୟାଚ୍ ଦେଖିବାକୁ ପାଇବେ ବୋଲି ଆଶା କରାଯାଉଛି। ଉଭୟ ଦଳ ମ୍ୟାଚ୍ ବିଜୟରୁ ସିରିଜ ଆରମ୍ଭ କରିବାକୁ ଯାଉଛନ୍ତି।
ହାଇଦ୍ରାବାଦରେ ଟିମ ଇଣ୍ଡିଆର ରେକର୍ଡ
ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମରେ ଟିମ୍ ଇଣ୍ଡିଆ ଏପର୍ଯ୍ୟନ୍ତ ୫ଟି ଟେଷ୍ଟ ମ୍ୟାଚ୍ ଖେଳିଛି। ଯେଉଁଥିରେ ଟିମ୍ ଇଣ୍ଡିଆ ୪ଟି ମ୍ୟାଚ୍ ଜିତିଛି। ଆଉ ଗୋଟିଏ ମ୍ୟାଚ୍ ଡ୍ରରେ ଶେଷ ହୋଇଥିଲା। ହାଇଦ୍ରାବାଦରେ ଆଜି ପର୍ଯ୍ୟନ୍ତ ଟିମ୍ ଇଣ୍ଡିଆ ଗୋଟିଏ ବି ଟେଷ୍ଟ ମ୍ୟାଚ୍ ହାରିନାହିଁ। ବର୍ତ୍ତମାନ ରୋହିତ ଶର୍ମାଙ୍କ ଅଧିନାୟକତ୍ୱରେ ଟିମ୍ ଇଣ୍ଡିଆ ପୁଣି ଥରେ ଏହି ରେକର୍ଡ ବଜାୟ ରଖିବାକୁ ଚାହୁଁଛି। ହାଇଦ୍ରାବାଦରେ ପ୍ରଥମେ ବ୍ୟାଟିଂ କରୁଥିବା ଦଳ ମାତ୍ର ୨ଟି ମ୍ୟାଚ ଜିତିଛି ଏବଂ ପରେ ବ୍ୟାଟିଂ କରୁଥିବା ଦଳ ମାତ୍ର ୨ଟି ମ୍ୟାଚ ଜିତିଛି।
ଏହି ଗ୍ରାଉଣ୍ଡରେ ସର୍ବାଧିକ ସ୍କୋର ଟିମ୍ ଇଣ୍ଡିଆର ମଧ୍ୟ ରହିଛି। ୨୦୧୭ ମସିହାରେ ବାଂଲାଦେଶ ବିପକ୍ଷରେ ଟିମ୍ ଇଣ୍ଡିଆ ୬୮୭ ରନ୍ ସ୍କୋର କରିଥିଲା। ଏହି ଗ୍ରାଉଣ୍ଡରେ ଟିମ୍ ଇଣ୍ଡିଆର ଉତ୍କୃଷ୍ଟ ରେକର୍ଡ ହେତୁ ଟିମ୍ ଇଣ୍ଡିଆ ମ୍ୟାଚ୍ ଜିତିବ ବୋଲି ଆଶା କରାଯାଉଛି। କିନ୍ତୁ ଭାରତୀୟ ଦଳ ଇଂଲଣ୍ଡକୁ ହାଲୁକା ଭାବେ ନେବାକୁ ଚାହୁଁନାହିଁ।
ଇଂଲଣ୍ଡ: ଜ୍ୟାକ କ୍ରଲି, ବେନ୍ ଡକେଟ୍, ଓଲି ପୋପ୍, ଜୋ ରୁଟ୍, ଜନି ବେୟାରଷ୍ଟୋ, ବେନ୍ ଷ୍ଟୋକ୍ସ (ଅଧିନାୟକ), ବେନ୍ ଫୋକ୍ସ, ରେହାନ ଅହମ୍ମଦ, ଟମ ହାର୍ଟଲି, ମାର୍କ ୱୁଡ, ଜ୍ୟାକ୍ ଲିଚ୍।
